တရုတ်နိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရောက်ရှိနေသော နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန် ၁၆ ရက် မွန်းလွဲပိုင်းက တရုတ်နိုင်ငံ၊ ပေကျင်းမြို့ရှိ တီယန်အန်မင်ရင်ပြင် (Tiananmen Square) သို့ သွားရောက်ကာ ပြည်သူ့သူရဲကောင်းများ အထိမ်းအမှတ်ဗိမာန် (Monument to the People’s Heroes) ၌ လွမ်းသူ့ပန်းခွေချ အလေးပြုခဲ့သည်။
အခမ်းအနားတွင် နိုင်ငံတော်သမ္မတသည် လွမ်းသူ့ပန်းခွေချပြီးနောက် တရုတ်နိုင်ငံ၏ လွတ်လပ်ရေး၊ တော်လှန်ရေးနှင့် နိုင်ငံတည်ဆောက်ရေး လုပ်ငန်းစဉ်များအတွင်း အသက်ပေးလှူခဲ့ကြသည့် သူရဲကောင်းများအား ဂုဏ်ပြုအလေးပြုခဲ့ကြောင်း သိရသည်။
ပြည်သူ့သူရဲကောင်းများ အထိမ်းအမှတ်ဗိမာန်သည် တီယန်အန်မင်ရင်ပြင်၏ ဗဟိုတွင် တည်ရှိပြီး တရုတ်နိုင်ငံ၏ အရေးပါဆုံး အမျိုးသားအထိမ်းအမှတ် အဆောက်အအုံများအနက် တစ်ခုဖြစ်သည်။ အမြင့် ၃၈ မီတာခန့်ရှိ အဆိုပါ ကျောက်တိုင်ကြီးကို တရုတ်ပြည်သူများ၏ တော်လှန်ရေးသမိုင်းတွင် အသက်ပေးခဲ့ကြသည့် သူရဲကောင်းများအား ဂုဏ်ပြုရန် ရည်ရွယ်တည်ဆောက်ခဲ့ခြင်းဖြစ်သည်။
တီယန်အန်မင်ရင်ပြင်သည် ကမ္ဘာ့အကြီးဆုံး မြို့ပြရင်ပြင်များအနက် တစ်ခုဖြစ်ပြီး တရုတ်နိုင်ငံ၏ နိုင်ငံရေးနှင့် အမျိုးသားအဆင့် အခမ်းအနားများ ကျင်းပရာ အထင်ကရနေရာတစ်ခုလည်း ဖြစ်သည်။ အဆိုပါရင်ပြင်အတွင်း ပြည်သူ့ခန်းမဆောင်ကြီး (Great Hall of the People)၊ တရုတ်အမျိုးသားပြတိုက်နှင့် မော်စီတုန်း အထိမ်းအမှတ်ဗိမာန်တို့ တည်ရှိနေသည်။
နိုင်ငံတော်သမ္မတ ဦးမင်းအောင်လှိုင်၏ ယခုခရီးစဉ်အတွင်း တရုတ်နိုင်ငံသမ္မတ မစ္စတာ ရှီကျင့်ဖျင်နှင့် တွေ့ဆုံဆွေးနွေးမှုများ ပြုလုပ်ခဲ့ပြီး နှစ်နိုင်ငံ ပူးပေါင်းဆောင်ရွက်ရေးဆိုင်ရာ သဘောတူညီချက်များ လက်မှတ်ရေးထိုးခြင်း၊ အဆင့်မြင့်ခေါင်းဆောင်များ တွေ့ဆုံဆွေးနွေးခြင်းများကိုလည်း ဆက်လက်ပြုလုပ်လျက်ရှိကြောင်း သိရသည်။
