ရန်ကုန်မြို့၊ ကျောက်တံတားမြို့နယ်၊ ဗိုလ်ချုပ်အောင်ဆန်းလမ်း (အမှတ် ၃၂၇) ၌တည်ရှိသည့် နှစ်ပေါင်း ၁၀၀ ကျော်သက်တမ်းရှိ ရှေးဟောင်းသမိုင်းဝင်အမွေအနှစ် ဝဇီရာဂုဏ်ပြုခံ ကဇာတ်ရုံအား မူလလက်ရာမပျက်ပြင်ဆင်ထိန်းသိမ်းမှုများပြုလုပ်ကာ အဆင့်မြှင့်တင်ခဲ့ပြီးနောက် ယနေ့ ဂျူလိုင်လ ၂၇ ရက်တွင် ဝဇီရာနိုင်ငံတကာအဆင့်မီဂုဏ်ပြုခံကဇာတ်ရုံအဖြစ် ဖွင့်လှစ်ပွဲသည့် အခမ်းအနားကျင်းပခဲ့သည်။
ဖွင့်ပွဲအခမ်းအနားသို့ နိုင်ငံကျော်အနုပညာရှင်များဖြစ်သည့် ရန်အောင်၊ စိုးမြတ်သူဇာ၊ ခန့်စည်သူ၊ ဝတ်မှုံရွှေရည်တို့ဇနီးမောင်နှံ၊ ဟိန်းဝေယံတို့ဇနီးမောင်နှံ စသည့် ရုပ်ရှင်၊ သဘင်၊ ဂီတမှ အနုပညာရှင် အတတ်ပညာရှင်ပေါင်းများစွာမှ ဂုဏ်ပြုတက်ရောက်လာသည့် မြင်ကွင်းပုံရိပ်များ ဖော်ပြလိုက်ပါသည်။
အဆိုပါ ဝဇီရာရုပ်ရှင်ရုံကြီးကို ပြန်ကြားရေးဝန်ကြီးဌာနမှ ဦးဆောင်ကာ နိုင်ငံတကာအဆင့်မီ ဂုဏ်ပြုခံကဇာတ်ရုံအဖြစ် မူလလက်ရာမပျက်အဆင့်မြှင့်တင်ခဲ့ခြင်းဖြစ်သည်။ ဝဇီရာရုပ်ရှင်ရုံ အဆောက်အဦး၏ဗိသုကာလက်ရာများသည် ၁၆ ရာစုမှ ၁၈ ရာစုအတွင်းရှိ ပြင်သစ်ဗိသုကာ အသွင်အပြင်များ ပေါင်းစပ်ထားသည့် Beaux Arts ဗိသုကာလက်ရာပုံစံဖြစ်ကာ ရုပ်လုံးရုပ်ကြွများဖြင့် လှပခမ်းနားစွာ တန်ဆာဆင်ထားသည်။ ရှေ့မျက်နှာစာတွင် ကျောက်တိုင်ကြီး ၄ လုံးကို ခံ့ညားစွာ တွေ့ရှိနိုင်ပြီး အနုစိတ်ထားသည့် အင်္ဂတေ ပန်းတော့ လက်ရာများဖြင့် ရွှေရောင်လွှမ်းသည့် အနုပညာလက်ရာများ ပါဝင်ဖွဲ့စည်းထားသည့် ကမ္ဘာ့အဆင့်မီ ရှေးဟောင်းဗိသုကာအလှအပများအား ထင်ရှားစွာ တွေ့မြင်နိုင်သည်။
