ထိုင်းရိုးရာ ကွေ့သယို (Kuay Teow) က အမျိုးအစားအများကြီးရှိပါတယ်။ အစပ်၊ အချဉ်၊ အငန်၊ အချို စတဲ့ အရသာတွေနဲ့ ပုံစံအမျိုးမျိုး ချက်ကြပါတယ်။ ဒီထဲကမှ လူကြိုက်များပြီး အခြေခံကျတဲ့ ထိုင်းစွပ်ပြုတ် ကွေ့သယို (Kuay Teow Nam) ချက်နည်းကို သင်တန်းသူတစ်ယောက်မေးထားလို့ ပြောပြပေးပါမယ်။
ကွေ့သယိုကို Boat Noodle လို့လဲခေါ်ပါတယ်။
Boat Noodle ဆိုတာဘာလဲရင်
Boat Noodle ဆိုတဲ့ နာမည်က ရှေးတုန်းက ထိုင်းနိုင်ငံရဲ့ မြစ်ချောင်းတွေမှာ လှေငယ်လေးတွေနဲ့ ရောင်းချခဲ့တဲ့ ရိုးရာခေါက်ဆွဲကို ဆိုလိုတာပါ။ ကုန်သည်တွေဟာ သူတို့လှေလေးတွေပေါ်ကနေ ဈေးဝယ်သူတွေကို ခေါက်ဆွဲပူပူလေးတွေ ရောင်းချပေးခဲ့ကြပါတယ်။ အဲ့ဒီတုန်းက လှေလေးတွေ မတိမ်းမမှောက်အောင်နဲ့ ခေါက်ဆွဲတွေ မဖိတ်စင်ရအောင် ပန်းကန်လုံးသေးသေးလေးတွေနဲ့ နည်းနည်းစီထည့်ပြီး ရောင်းချခဲ့ကြပါတယ်။ ဒါကြောင့် ဒီနေ့ခေတ်မှာလည်း Boat Noodle ဆိုင်တွေမှာ ခေါက်ဆွဲပန်းကန်လုံး သေးသေးလေးတွေနဲ့ပဲ ပေးတတ်တာကို တွေ့ရမှာပါ။
ထိုင်းစွပ်ပြုတ် ကွေ့သယို (Kuay Teow Nam) ချက်နည်း
ပါဝင်ပစ္စည်းများ (၄ ယောက်စာ)
၁။ အရည် (Broth) အတွက်
– ဝက်ရိုး / အမဲရိုး/ကြက်ရိုး = ၅၀၀ ဂရမ် (သို့မဟုတ်) ဝက်နံရိုးအစရှိတဲ့ အရိုးအစိတ်အပိုင်း
– ရေ = ၂-၃ လီတာ
– ကြက်သွန်ဖြူ = ၅-၆ မြွှာ (ထောင်းထားပါ)
– ငရုတ်ကောင်းစေ့ (အဖြူ/အနက်) = လက်ဖက်ရည်ဇွန်း ၁ ဇွန်း (အနည်းငယ် ထောင်းထားပါ)
– နံနံပင် အမြစ် = ၃-၄ ပင် (သန့်စင်ပြီး ထောင်းထားပါ)
– မုန်လာဥဖြူ (Daikon) = ၁ လုံး (အတုံးကြီး လှီးထားပါ)
– ဆား = လက်ဖက်ရည်ဇွန်း ၁-၂ ဇွန်း (အရသာအလိုက်)
– ငါးငံပြာရည် (Fish Sauce) = စားပွဲဇွန်း ၂-၃ ဇွန်း (အရသာအလိုက်)
– သကြား = ထမင်းစားဇွန်း ၂ ဇွန်း (သို့မဟုတ် ထန်းလျက်ခဲ အနည်းငယ်)
– နာနတ်ပွင့် (Star Anise) = ၂ ပွင့်
– သစ်ကြံပိုးခေါက် (Cinnamon Stick) = လက် ၃ စစ် ၁ခေါက်။
– နံနံစေ့ (Coriander Seed ) = ၁ ဇွန်း (မရှိလဲ မထည့်လို့ရ)
မှတ်ချက်= အရသာ ပိုကောင်းချင်ရင် Ready made Kuay Teow Seasoning Powder ထမင်းစားဇွန်း ၁ဇွန်း လောက်ထည့်ရင်ပိုကောင်းပါတယ်။
အခုချက်နည်းက အကြည်ပါ အရောင်လိုချင်ပါက = ပဲငံပြာရည် အပျစ် အနည်းငယ်ထည့်ပေးပါ။
ဝက်သွေး လောင်းထည့်လို့ရပါသေးတယ် ကျနော်ကတော့ မကြိုက်ပါ။
၂။ ခေါက်ဆွဲနှင့် အသားများအတွက်
-ကွေ့သယိုဖတ် (Rice Noodles) = သင်နှစ်သက်ရာ အဖတ်အမျိုးအစား (အသားဖတ်၊ အချောင်းဖတ်၊ အဝိုင်းဖတ်) (၁ ပွဲစာ ၈၀-၁၀၀ ဂရမ်ခန့်)
-ဝက်သားအသားလွှာ / ကြက်သားအသားလွှာ: ၁၅၀-၂၀၀ ဂရမ် (ပါးပါးလှီးထားပါ)
– အသားလုံး (Meatballs) = ဝက်သားလုံး / ကြက်သားလုံး (သင်နှစ်သက်ရာ)
– ဝက်အူချောင်း / ငါးဖယ်လုံး = (ရွေးချယ်နိုင်သည်)
– ပဲပင်ပေါက် = လက်တစ်ဆုပ်စာ
-ကန်စွန်းရွက် =လက်တစ်ဆုပ်စာ
၃။ အလှဆင်ရန်နှင့် တွဲဖက်စားရန်
– ကြက်သွန်ဖြူဆီချက် (Garlic Oil) = ကြက်သွန်ဖြူ ပါးပါးလှီး ဆီနဲ့ ကြော်ထားတာ (အပြင်မှာ ဝယ်လို့ရသလို ကိုယ်တိုင်လည်း လုပ်လို့ရပါတယ်)
– နံနံပင် / တရုတ်နံနံပင် နုပ်နုပ်စဉ်းထားပါ
– မြေပဲဆန် (လှော်ပြီး ထောင်းထား) = အနည်းငယ်
– ငရုတ်သီးမှုန့် (အလှော်)
– ရှာလကာရည် (White Vinegar) နှင့် ငရုတ်သီးစိမ်းလှီးထားခြင်း (Prik Nam Som)(နှစ်ခုရောပြီး ကြိတ်ထားလဲရ)
– သကြား
– ငါးငံပြာရည်
– သံပုရာသီး
ပြုလုပ်နည်းအဆင့်ဆင့်
၁။ အရည်တည်ခြင်း (Broth Preparation)
– အိုးကြီးတစ်လုံးထဲမှာ ဝက်ရိုး/ကြက်ရိုးနဲ့ ရေကိုထည့်ပြီး အပူပေးပါ။ ဆူလာရင် အပေါ်ယံက အမြှုပ်တွေကို ခပ်ထုတ်ပါ။
– ထောင်းထားတဲ့ ကြက်သွန်ဖြူ၊ ငရုတ်ကောင်းစေ့၊ နံနံပင်အမြစ်၊ မုန်လာဥဖြူ၊ နာနတ်ပွင့်/သစ်ကြံပိုးခေါက် (ထည့်ရင်) တို့ကို ထည့်ပါ။
– ဆား၊ ငါးငံပြာရည်၊ သကြား တို့ကို ထည့်ပြီး ရောမွှေပါ။
– အဖုံးပိတ်ပြီး မီးအေးအေးနဲ့ အနည်းဆုံး ၁ နာရီမှ ၂ နာရီအထိ တည်ပါ။ ကြာကြာတည်လေ အရည်က ပိုမွှေးပြီး အရသာပိုရှိလေပါပဲ။
၂။ အသားများနှင့် ခေါက်ဆွဲပြင်ဆင်ခြင်း:
– အရည်တည်နေတဲ့ အချိန်မှာ အသားလုံးတွေကို ရေနွေးထဲမှာ ဆူအောင်တည်ပြီး ဆယ်ထားပါ။
– ဝက်သား/ကြက်သား အသားလွှာတွေကိုလည်း ရေနွေးဆူဆူထဲမှာ ခဏတာနှစ်ပြီး ကျက်အောင် ပြုတ်၊ ဆယ်ထားပါ။ (သို့မဟုတ်) အရည်ထဲမှာ အသားလွှာတွေကို နူးသည်အထိ ပြုတ်နိုင်ပါတယ်။
– ကွေ့သယိုဖတ်များကို ထုပ်ပိုးထားတဲ့ ညွှန်ကြားချက်အတိုင်း ရေနွေးနဲ့ စိမ်တာ ဒါမှမဟုတ် ပြုတ်တာ ပြုလုပ်ပါ။ ရေစစ်ပြီး ပန်းကန်လုံးထဲ ထည့်ထားပါ။
– ပဲပင်ပေါက်နဲ့ ကန်စွန်းရွက်/ဂေါ်ဖီတို့ကို ရေနွေးဆူဆူထဲမှာ ခဏတာနှစ်ပြီး ချက်ချင်းဆယ်ကာ ရေစစ်ထားပါ။
၃။ ကွေ့သယိုပြင်ဆင်ခြင်း
– ပန်းကန်လုံးတစ်လုံးစီမှာ ပြုတ်ထားတဲ့ ကွေ့သယိုဖတ် ထည့်ပါ။
– ပြီးရင် ပဲပင်ပေါက်၊ ကန်စွန်းရွက်/ဂေါ်ဖီ၊ အသားလုံး၊ အသားလွှာများ ကို အပေါ်ကနေ စီထည့်ပါ။
– ဆူနေတဲ့ ကွေ့သယိုအရည် ကို လိုအပ်သလောက် လောင်းထည့်ပါ။
– အပေါ်ကနေ ကြက်သွန်ဖြူဆီချက်၊ နံနံပင်/တရုတ်နံနံပင်၊ လှော်ထားတဲ့ မြေပဲဆန် တို့ကို ဖြူးပါ။
၄။ တွဲဖက်စားရန် (Condiments)
– ထိုင်းကွေ့သယိုကို စားတဲ့အခါ မိမိနှစ်သက်ရာ အရသာကို ထပ်ဖြည့်နိုင်အောင် ငရုတ်သီးမှုန့်၊ ရှာလကာရည်ထဲစိမ်ထားသော ငရုတ်သီးစိမ်း၊ သကြား၊ ငါးငံပြာရည်၊ သံပုရာသီးစိတ် တို့ကို ဘေးချင်းကပ်ပြီး ချပေးလေ့ရှိပါတယ်။ မိမိကြိုက်နှစ်သက်ရာ အရသာဖြစ်အောင် ထပ်ဖြည့်စားသုံးနိုင်ပါတယ်။
အမျိုးကွဲများ
– အသားအမျိုးအစား = ဝက်သား၊ ကြက်သားအပြင် အမဲသား (Beef Noodles)၊ ပင်လယ်စာ (Seafood Noodles) တို့နဲ့လည်း ချက်ပြုတ်နိုင်ပါတယ်။
– အရသာ = ထိုင်းကွေ့သယိုမှာ အရသာအမျိုးမျိုးရှိပါတယ်။
– Nam Sai (Clear Soup) = အပေါ်က ပြောပြခဲ့တဲ့ အကြည်ရောင် စွပ်ပြုတ်ကွေ့သယိုပါ။
– Nam Tok (Boat Noodles) = ဝက်သွေး ဒါမှမဟုတ် အမဲသွေး အနည်းငယ်ထည့်ပြီး ချက်ထားတာဖြစ်လို့ အရောင်ရင့်ပြီး အရသာပိုပြင်းပါတယ်။
– Tom Yum = ချဉ်ငံစပ်အရသာဖြစ်ပြီး ငရုတ်ဆီ၊ သံပုရာရည်၊ ငရုတ်သီးတို့နဲ့ ပိုစပ်ပါတယ်။
– Yen Ta Fo=ပန်းရောင်စွပ်ပြုတ်ဖြစ်ပြီး အသားလုံး၊ ငါးဖယ်၊ ကင်းမွန်ခြောက် စတာတွေ ပါဝင်ပါတယ်။
– ကိုယ်တိုင်လုပ် ကြက်သွန်ဖြူဆီချက်ကြက်သွန်ဖြူကို ပါးပါးလှီးပြီး ဆီများများနဲ့ မီးအေးအေးမှာ ရွှေညိုရောင်ပြောင်းလာတဲ့အထိ ကြော်ပါ။ အအေးခံပြီး ဆီနဲ့အတူ သိမ်းဆည်းထားနိုင်ပါတယ်။
ဒီချက်နည်းက အခြေခံအားဖြင့် ရိုးရာစွပ်ပြုတ် ကွေ့သယိုတစ်ပွဲအတွက် လုံလောက်ပါတယ်။ စမ်းပြီး ချက်ကြည့်ရင်းနဲ့ သင့်ကိုယ်ပိုင် အရသာအကြိုက်ကို ရှာဖွေနိုင်ပါတယ်။
