ဟင်းချက်တဲ့အခါ ဟင်းအိုးဝေကျလို့ မီးဖိုချောင်းညစ်ပတ်သွားတဲ့အခါ၊ သားငါးနဲ့ ဟင်းသီးဟင်းရွက်လှီးဖြတ်ရင်း လက်ဓားရှတဲ့အချိန်တွေ လူတိုင်းကြုံတွေ့ရမှာပါပဲ။ ဒီလိုအသေးအဖွဲလေးတွေက ဟင်းလျာပြင်ဆင်ချက်ပြုတ်ရာမှာ စိတ်အနှောင့်အယှက်ဖြစ်နေပါတယ်။
အခုဖော်ပြပေးမယ့်နည်းလမ်းလေးတွေ ဆက်ဖတ်ကြည့်လိုက်မယ်ဆို အဲ့ဒီပြဿနာလေးတွေကို ဘယ်လိုရင်ဆိုင်ကျော်လွှားရမလဲဆိုတာ သိသွားပါလိမ့်မယ်။
ငါးကြော်တဲ့အခါ
ငါးကြော်တဲ့အခါ အသားတုံးရဲ့ထိပ်ဖျားပိုင်းတွေကပဲ အကျက်လွန်ပြီး တူးသွားတတ်ပေမယ့် အသားများတဲ့အပိုင်းကျတော့ တော်တော်နဲ့မကျက်တတ်ပါဘူး။ အဲ့ဒါအခါ ထိပ်ဖျားပိုင်းကို ပုံမှာပြထားသလို လှီးပြီးလိပ်ပေးလိုက်ပါ။ ငါးကြော် တူးသွားမှာမဟုတ်တော့ပါဘူး။
ကြက်ဥ Half-Fried ကြော်တဲ့အခါ
စက္ကန့်ပိုင်းအတွင်း ကြက်ဥမြန်မြန်ကျက်ချင်တယ်ဆိုရင် ကြက်ဥကြော်နေတုန်းရေခဲတုံးထည့်ကြော်ပေးလိုက်ပါ။ စက္ကန့်ပိုင်းအတွင်း အမြန်ကျက်သွားပါလိမ့်မယ်။
ခရမ်းချဉ်သီးဆော့စ်
ခရမ်းချဉ်သီးဆော့စ်များကို ရေရှည်အထားခံချင်တယ်ဆိုရင် ပုလင်းထဲမှာ ထည့်မထားဘဲ ရေခဲတုံးပုံစံခွက်လေးထဲမှာ ထည့်သိမ်းထားပါ။
ကြက်ဥအနှစ်များ မလွှင့်ပစ်ရအောင် ဘယ်လိုလုပ်မလဲ။
ပေါင်မုန့်ဖုတ်တဲ့အခါပဲဖြစ်ဖြစ်၊ အချိုပွဲပြုလုပ်တဲ့အခါပဲဖြစ်ဖြစ်၊ ကြက်ဥအကာကိုပဲ သုံးပြီး ကြက်ဥအနှစ်အသုံးမပြုရဘူးဆိုရင် မလွှင့်ပစ်လိုက်ဘဲ ရေခဲတုံးထည့်တဲ့ပုံစံခွက်ထဲမှာပဲ ထည့်သိမ်းထားလိုက်ပါ။
ကြက်ဥပြုတ် အခွံခွာတဲ့အခါ
တခါတလေ ကြက်ဥပြုတ်အခွံခွာတဲ့အခါ ကြက်ဥအသားတွေ အခွံနဲ့အတူပဲ့ပါသွားတတ်ပါတယ်။ ဒါဆိုရင် ဇွန်းတစ်ချောင်းသာ အသုံးပြုလိုက်ပါ။ ကြက်ဥပြုတ်ကို အက်ရာတောက်လျှောက်ပေးပြီး ဇွန်းကို အထဲထည့်ကာ ခွာလိုက်ရုံပါပဲ။
ဟင်းအိုး ဝေမကျအောင်လို့ ဘယ်လိုလုပ်ရမလဲ။
ဟင်းရည်အိုးတည်ထားတဲ့အခါ ယောင်မကို အိုးပေါ်မှာ ကန့်လန့်တင်ထားမယ်ဆိုရင် ဟင်းရည်တွေ ဝေကျတော့မှာမဟုတ်ပါဘူး။
သစ်သီးတွေ မစားခင်မှာ ရေခဲသေတ္တာထဲမှာ ဇောက်ထိုးထားပေးပါ။
နာနတ်သီးနဲ့ အခြားချိုတဲ့သစ်သီးတွေက အောက်ခြေမှာ သကြားဓာတ်တွေ အနည်ထိုင်လေ့ရှိပါတယ်။ ဒါ့ကြောင့် သဘာဝအချိုဓာတ်ကို ရရှိချင်တယ်ဆိုရင် မစားခင်မှာ ရေခဲသေတ္တာထဲ ဇောက်ထိုးထောင်ထားပေးလိုက်ပါ။
ဟင်းသီးဟင်းရွက်တွေ လှီးဖြတ်တဲ့အခါ
လင်ဗန်းအကြီးကြီးထဲမှာ စဉ်းနီတုံးထည့်ပြီး ဟင်းသီးဟင်းရွက်များ လှီးဖြတ်ပေးလိုက်ပါ။ ဒါဆိုရင် မီးဖိုချောင်ကို သန့်ရှင်းရေးလုပ်ရတာ လွယ်ကူသွားပါလိမ့်မယ်။
ငှက်ပျောသီးကို လတ်လတ်ဆတ်ဆတ်နဲ့ ကြာရှည်အထားခံချင်တယ်ဆိုရင်
ငှက်ပျောသီးရဲ့ ပင်စည်ထိပ်ဖျားကို ပလပ်စတစ်အိတ်နဲ့ပတ်ထားပေးလိုက်ပါ။ ဒါဆိုရင် မြန်မြန်မမှည့်စေဘဲ ကြာရှည်အထားခံမှာဖြစ်ပါတယ်။
ငှက်ပျောသီးများ အမှည့်လွန်သွားတဲ့အခါ
ငှက်ပျောသိးများ အညိုကွက်တွေပေါ်လာပြီး အမှည့်လွန်လို့ ပျော့သွားတဲ့အခါ လွှင့်မပစ်ပါနဲ့။ ငှက်ပျောသီးမှည့်ကို အသာလေးညှစ်ပေးလိုက်ပြီး ရေခဲသေတ္တာထဲထည့် အအေးခံထားလိုက်ပါ။ အမှည့်လွန်တဲ့ငှက်ပျောသီးတွေက အရမ်းချိုတဲ့အတွက်ကြောင့် ငှက်ပျောသီးဖျော်ရည်လုပ်သောက်ရင် အင်မတန်အရသာရှိပါတယ်။
အနားသတ်က တိတိရိရိနဲ့ ဝိုင်းစက်တဲ့ ကြက်ဥ Half-Fried ကြော်စားချင်တယ်ဆိုရင်
ကြက်သွန်အလုံးကြီးတစ်လုံးကို အခွံခွာပါ။ ထက်ဝက်လှီးဖြတ်ပြီးနောက် ကြက်သွန်ကွင်းတစ်ကွင်းကို ခွာလိုက်ပါ။ ဒယ်အိုးကို အပူပေးပြီး ဆီထည့်ကာ ကြက်သွန်ကွင်း ထည့်လိုက်ပါ။ ကြက်ဥကို ကြက်သွန်ကွင်းထဲ ဖောက်ထည့်ပြီး ဆားထည့်ကာ ကြော်လိုက်ပါ။
ဒါဆိုရင်တော့ ပြီးပြည့်စုံပြီး ဝိုင်းစက်နေတဲ့ ကြက်ဥကြော်လေး ရရှိသွားပါပြီ။
ကြက်ဥအခွံခွာတဲ့အခါ ကြက်ဥအသားများ ပဲ့ပါမသွားဖို့ရန်အတွက် ဘယ်လိုလုပ်ရမလဲ
ကြက်ဥမပြုတ်ခင်မှာ ကြက်ဥကို အရင်ဦးဆုံး ပင်အပ်ကလေးနဲ့ သေးငယ်တဲ့အပေါက်လေး ဖောက်လိုက်ပါ။ ထို့နောက် အိုးထဲမှာ ၁၀ မိနစ်ခန့် ထည့်ပြုတ်လိုက်ပါ။
အချိန်ပြည့်တဲ့အခါ အိုးထဲက ရေများကို သွန်ထုတ်လိုက်ပြီး အိုးအဖုံးပိတ်ကာ အထဲက ကြက်ဥများကို လှုပ်ခါလိုက်ပါ။ ကြက်ဥအခွံများ အက်ကွဲသွားပါလိမ့်မယ်။ ပြီးမှ အိုးထဲ ရေထည့်ပြီး ကြက်ဥများကို အအေးခံလိုက်ပါ။
ဒါဆိုရင်တော့ ကြက်ဥများကို စက္ကန့်ပိုင်းအတွင်း လျင်မြန်စွာအခွံခွာလို့ရပါပြီ။
ကြက်ဥ အလုံးအရေအတွက် အများကြီးကို တစ်ပြိုင်နက်တည်း ချက်ပြုတ်ချင်တယ်ဆိုရင်
Oven ထဲထည့်မယ့် လင်ဗန်းပေါ်သို့ ရေစိုနေသော ပုဝါတစ်ထည် ခင်းလိုက်ပါ။ ထိုပုဝါပေါ်သို့ ကြက်ဥများကို အစီအရီတင်ထားလိုက်ပါ။ ထို့နောက် Oven ထဲတွင် မိနစ် ၃၀ ခန့် ထည့်ထားလိုက်ပါ။ ဒီနည်းလမ်းက အချိန်မရတဲ့သူတွေအတွက် အသုံးတည့်မယ့် နည်းလမ်းတစ်ခုပဲဖြစ်ပါတယ်။
အသားများကို အချိန်တိုအတွင်း နူးအိချင်တယ်ဆိုရင်
ကော်ဖီအကြမ်းမှုန့်ကို အသုံးပြုနိုင်ပါတယ်။ ကော်ဖီအကြမ်းမှုန့်၊ ရှာလကာရည်၊ ကြက်သွန်နီ၊ ကြက်သွန်မြိတ်၊ ဆားနှင့် ငရုတ်ကောင်းတို့ကို သမအောင် ရောနှောပြီးနောက် အသားကို ထိုကော်ဖီအရည်ထဲစိမ်ထားလိုက်ပါ။ မိနစ် ၃၀ ခန့်မှ ၃ နာရီကြာသည်အထိ စိမ်ထားနိုင်ပါတယ်။
ဒီနည်းလမ်းက သင်ချက်ပြုတ်မယ့်အသားကို အချိန်တိုအတွင်း နူးအိသွားစေပြီး အရသာရှိစေမှာပဲဖြစ်ပါတယ်။
ကိတ်မုန့်လှီးတဲ့အခါ ဓားပေါ်မှာ ကိတ်မုန့်မပေဖို့အတွက်
ဓားကို ရေနွေးပူနဲ့ အရင်ဆုံးဆေးပြီးမှ ကိတ်မုန့်လှီးဖြတ်လိုက်ပါ။ ဒါဆိုရင် ကိတ်မုန့်တွေ ကပ်နေမှာမဟုတ်တော့ပါဘူး။
ကြည်လင်တဲ့ ရေခဲတုံး ဖန်တီးချင်တဲ့အခါ
ရေကို ရေခဲတုံးမပြောင်းခင် အရင် ကျိုချက်လိုက်ပြီးမှ ရေခဲတုံးပုံစံခွက်ထဲ ထည့်လိုက်ပါ။ ပုံမှန်ရေခဲတုံးပုံစံမျိုးမဟုတ်ဘဲ ကြည်လင်ပြီး ဖောက်ထွင်းမြင်ရတဲ့ ရေခဲတုံးရရှိသွားပါလိမ့်မယ်။
သစ်သီးများကို အရည်များများရချင်တဲ့အခါ
သစ်သီးမလှီးခင် စားပွဲပေါ်မှာ အရင်ဆုံးလှိမ့်ပေးလိုက်ပါ။ ပုံမှန်ထက်ပိုပြီး အရည်များများရပါလိမ့်မယ်။
ဆော့စ်များ၊ အချဉ်ရည်များ ညှစ်ရခက်နေပါသလား
ကြည်ဥပုံစံခွက်ထဲမှာ အချဉ်ရည်ပုလင်းများ ဇောက်ထိုးမှောက်ထားပေးလိုက်ပါ။ ဟင်းချက်တဲ့အခါ ဆော့စ်များကို အားစိုက်ညှစ်စရာမလိုဘဲ သူ့အလိုလို အမြန်ထွက်ကျလာပါလိမ့်မယ်။
Oven ထဲထည့်ချက်တဲ့အခါ မတူးဖို့ရန်အတွက်
Oven ထဲ ထည့်ချက်တဲ့အခါ စားစာရာများ အတွင်းထဲမှာတော့ မကျက်သေးဘဲ အပေါ်ပိုင်းမှာ တူးသွားတတ်ပါတယ်။ အဲ့ဒီအခါ ခဲဖတ်လေးနဲ့ အုပ်ထားလိုက်ပါ။
ခရမ်းချဉ်သီးကို အလွယ်တကူအခွံခွာနိုင်မယ့် နည်းလမ်း
ခရမ်းချဉ်သီးရဲ့ ထိပ်ပိုင်းကို X ပုံသဏ္ဍာန် ဓားရာပေးထားပြီး ပွက်ပွက်ဆူနေတဲ့ရေထဲမှာ ၁၀ စက္ကန့် ထည့်ပြုတ်ထားလိုက်ပါ။ ဒါဆိုရင် ခရမ်းချဉ်သီးအခွံကို အလွယ်တကူခွာလို့ ရသွားပါပြီ။
ဟင်းသီးဟင်းရွက်နဲ့ သစ်သီးဝလံများကို အအေးခံချင်တဲ့အခါ
ဟင်းချက်ခါနီးမှ လှီးဖြတ်တာမျိုးမဟုတ်ဘဲ အဆင်သင့်ချက်ပြုတ်ချင်တယ်ဆိုရင် ဟင်းသီးဟင်းရွက်များကို လှီးဖြတ်ထားပြီး အလုံပိတ်အိတ်ထဲမှာ လေမဝင်စေဘဲ ထည့်ပိတ်ထားပြီးနောက် ရေခဲသေတ္တာထဲ ထည့်ထားလိုက်ပါ။ စားစရာများ မနွမ်းသွားစေဘဲ လတ်လတ်ဆတ်ဆတ်ဖြစ်နေစေမှာပါ။
