နေပြည်တောင်ကောင်စီနယ်မြေရှိ ဝဏ္ဏသိဒ္ဓိအားကစားကွင်းကို မန္တလေးငလျင်ကြီးအပြီး၌ ပြန်လည်ပြင်ဆင်တည်ဆောက်မှုများ ပြုလုပ်နေကြောင်း အားကစားနှင့် လူငယ်ရေးရာဝန်ကြီးဌာန ဖော်ပြချက်အရ သိရသည်။
မန္တလေးငလျင်ကြီးကြောင့် ဝဏ္ဏသိဒ္ဓိအားကစားကွင်းအတွင်းရှိ အဆောက်အဦး ပတ်လည်နံရံများအား ပြန်လည်ဖာထေးပြုပြင်ခြင်း၊ VIP ဧည့်ခန်းမဆောင် အုတ်စီခြင်းလုပ်ငန်း၊ မှန်တပ်ဆင်ခြင်း ကြမ်းခင်းများနှင့် အုတ်နံရံများအား ပြုပြင်ဆောင်ရွက်ခြင်း၊ မီတာ ၄၀၀ Synthetic ပြေးလမ်းအား အသစ်ပြန်လည်ခင်းကျင်းခြင်းတို့ကို လုပ်ဆောင်နေသည်။
ထို့အပြင် ငလျင်ကြောင့်ပျ-က်စီးသွားသည့် ယခင် Synthetic ပြေးလမ်းအဟောင်းအား ခွာထုတ်ကာ ဘောလုံးကွင်း မြက်ခင်းပြန်လည်စိုက်ပျိုးပြီးစီးမှုနှင့် မြက်ခင်းများ စိမ်းလန်းစိုပြေစေရေးအတွက် ဘောလုံးကွင်းရေဖျန်းစနစ် (Field Sprinkler) များ ပြန်လည်တပ်ဆင်ခြင်း အထူးတန်းပွဲကြည့်စင်ပတ်လည် နံရံပလာစတာ ဖာထေးပြုပြင်ခြင်း၊ ဓါတ်လှေကားပြန်လည်ပြင်ဆင်ခြင်းတို့ကိုလည်း ဆောင်ရွက်နေကြောင်း သိရသည်။
