တပ်မတော်စစ်ကြောင်းများက ထန်တလန်မြို့တစ်ဝိုက်အား ပြန်လည်ထိန်းချုပ်ခဲ့ပြီး ဒေသဖွံ့ဖြိုးရေးလုပ်ငန်းများ ဆက်လက်ဆောင်ရွက်

နိုင်ငံတော်အစိုးရအနေဖြင့် ချင်းပြည်နယ်အတွင်းရှိ  မြို့ပြနှင့်ကျေးလက်ဒေသများ တည်ငြိမ်အေးချမ်းပြီး ဘက်စုံဖွံ့ဖြိုးတိုးတက်စေရန် ဘဏ္ဍာငွေများနှင့် အရင်းအမြစ်များစွာသုံးစွဲကာ အကောင်အထည်ဖော်ဆောင်ရွက်ပေးလျက်ရှိသည်။ သို့ရာတွင် CNF၊ CDF အမည်ခံအကြမ်းဖက်သောင်းကျန်းသူပူးပေါင်းအဖွဲ့များသည် ချင်းပြည်နယ်အတွင်းရှိ မြို့၊ ရွာများ၌ အစိုးရ၏အုပ်ချုပ်မှုယန္တရားများရပ်တန့်စေရန်နှင့် ၎င်းတို့စိတ်တိုင်းကျအုပ်ချုပ်နိုင်ရန်ရည်ရွယ်၍ဒေသကောင်းစားရေးဟု မက်လုံးများပေးကာ ဒေသခံပြည်သူများက ၎င်းတို့အပေါ်ထောက်ခံအားပေးလာစေရန် လုပ်ဆောင်ခဲ့ကြသော်လည်း အမှန်တကယ်တွင် မြို့၊ရွာများ၌ တိုက်ပွဲများဖော်ဆောင်ခဲ့သောကြောင့်  ပြည်သူလူထု၏အသက်အိုးအိမ်စည်းစိမ်များ ထိခိုက်သေကျေပျက်စီးမှုများစွာဖြစ်ပေါ်ခဲ့ရပြီး ဒေသခံပြည်သူများအနေဖြင့် ၎င်းတို့၏ တိုက်တာအိုးအိမ်များကို စွန့်ခွာ၍ ယာယီနေရပ်စွန့်ခွာနေထိုင်ခဲ့ကြရကာ ဒေသခံပြည်သူများ၏ ပညာရေး၊ ကျန်းမာရေး စသည့်လူမှုစီးပွားဘဝများလည်း  အဘက်ဘက်မှ  နိမ့်ကျဆုံးရှုံးခဲ့ရသည်။ 

ထို့ပြင် NUG, CRPH အကြမ်းဖက်အဖွဲ့များ၏ လက်ဝေခံများဖြစ်သည့် CNF, CDF အမည်ခံအကြမ်းဖက်သောင်းကျန်းသူပူးပေါင်းအဖွဲ့များသည်ချင်းပြည်နယ်၊  ထန်တလန်မြို့အား အစိုးရအုပ်ချုပ်မှုယန္တရားများ  ရပ်တန့်စေရန်အတွက် ၂၀၂၃ ခုနှစ်၊ ဖေဖော်ဝါရီလမှစ၍ ထန်တလန်မြို့၌ လုံခြုံရေးဆောင်ရွက်နေသည့် လုံခြုံရေးတပ်ဖွဲ့ဝင်များအား သာလွန်အင်အားများ၊ လက်နက်ကြီးများကို အဆမတန်အသုံးပြု၍ စစ်ရေးပစ်မှတ်မဟုတ်သည့် အစိုးရရုံးဌာနများ၊ သာသနိကအဆောက်အအုံများ၊ စာသင်ကျောင်းများ၊ ဆေးရုံဆေးခန်းများ၊ လူနေအဆောက်အအုံများကို အကာအကွယ် ရယူကာ ဝင်ရောက်ပစ်ခတ်တိုက်ခိုက်ခဲ့သောကြောင့် လုံခြုံရေးတပ်ဖွဲ့ဝင်များက အသက်ကိုပဓာနမထားဘဲ ရဲရဲဝံ့ဝံ့ကြံ့ကြံ့ခံခုခံခဲ့ကြသော်လည်း လုံခြုံရေးတပ်ဖွဲ့ဝင်များသည်  ထိခိုက်ဒဏ်ရာရရှိမှုများ များပြားလာခြင်း၊ ခဲယမ်းများနည်းပါးလာခြင်း၊ ရာသီဥတုအခြေအနေ၊ နယ်မြေအခြေအနေနှင့် ဒေသခံပြည်သူများ၏ နေအိမ်များ၊ ဌာနဆိုင်ရာအဆောက်အအုံများ ထိခိုက်ပျက်စီးမှုများဖြစ်ပေါ်လာသည့်အတွက် ထန်တလန်မြို့မှ ခေတ္တဆုတ်ခွာပေးခဲ့သည်။

အကြမ်းဖက်သောင်းကျန်းသူများအနေဖြင့် ထန်တလန်မြို့အား ယာယီထိန်းချုပ်ထားစဉ်အတွင်း လူနေအဆောက်အအုံများအတွင်းရှိ အသုံးအဆောင်ပစ္စည်းများနှင့်အဖိုးတန်ပစ္စည်းများကို  အတင်းအဓမ္မယူဆောင်အသုံးပြုခြင်း၊ စစ်ရေးပစ်မှတ်မဟုတ်သည့် အစိုးရရုံးဌာနများ၊ သာသနိကအဆောက်အအုံများ၊ စာသင်ကျောင်းများနှင့် ဆေးရုံဆေးခန်းများ၌ ဘန်ကာများ၊ ကတုတ်ကျင်းများ၊ ဆက်သွယ်ရေးမြောင်းများပြုလုပ်ကာ အခိုင်အမာခံစစ်ဆင်၍ မြို့၊ ရွာများအတွင်း တိုက်ပွဲများဖော်ဆောင်ရန် ကြိုးပမ်းလာသောကြောင့် တပ်မတော်စစ်ကြောင်းများက ပြည်သူလူထု၏အသက် အိုးအိမ်စည်းစိမ်ကို ကာကွယ်စောင့်ရှောက်ရန်နှင့် မြို့၊ ရွာများအတွင်းရှိ ဌာနဆိုင်ရာ အဆောက်အအုံများ၊ လူနေအဆောက်အအုံများထိခိုက်ပျက်စီးမှုအနည်းဆုံးဖြင့် ပြန်လည်သိမ်းပိုက်ရရှိရေးတို့အတွက် စီမံချက်များရေးဆွဲကာ လိုအပ်သည့်ပြင်ဆင်စုဖွဲ့များ ဆောင်ရွက်ပြီး အဆိုပါအကြမ်းဖက်သောင်းကျန်းသူများအား  အကြမ်းဖက်ချေမှုန်းမှုစစ်ဆင်ရေး (Counter– Terrorism Operation) ဖြင့်ဆောင်ရွက်ခဲ့ရာ ၂၀၂၃ ခုနှစ်၊ အောက်တိုဘာ ၂၉ ရက်တွင် ထန်တလန်မြို့အား အလုံးစုံပြန်လည် သိမ်းပိုက်ရရှိခဲ့ပြီး အကြမ်းဖက်သောင်းကျန်းသူများသည် ထိခိုက်သေဆုံးမှုများစွာဖြင့် ကစဉ့်ကလျား ဆုတ်ခွာထွက်ပြေးသွားခဲ့ကြသည်။ 

ထိုသို့ထိခိုက်သေဆုံးမှုများပြားခဲ့သော CNF, CDF အမည်ခံ အကြမ်းဖက် သောင်းကျန်းသူပူးပေါင်းအဖွဲ့များသည် ထန်တလန်မြို့အား ပြန်လည်တိုက်ခိုက်ရန်အတွက် လူ၊ လက်နက်ခဲယမ်းများ ပြန်လည်စုဆောင်းကာ ၂၀၂၄ ခုနှစ် ဇူလိုင်လ ၂၂ ရက်တွင် ဒုတိယအကြိမ်အဖြစ် လုံခြုံရေးတပ်ဖွဲ့ဝင်များအားအလစ်အငိုက်ရယူကာ လူအင်အား၊ လက်နက်အင်အား သာလွန်စွာဖြင့် တိုက်ခိုက်လာခဲ့ရာ လုံခြုံရေးတပ်ဖွဲ့ဝင်များသည် ထန်တလန်မြို့အား ရန်သူ့လက်သို့ မကျရောက်စေရေး ကျားကုတ်ကျားခဲ  ရဲရဲဝံ့ဝံ့ခုခံခဲ့ကြသော်လည်း အကြမ်းဖက်သောင်းကျန်းသူများသည် လူအင်အားများ အဆမတန်ဖြည့်တင်းလာခြင်း၊ ပြည်သူလူထုနေအိမ်များ၊  ဌာနဆိုင်ရာ အဆောက် အအုံများထိခိုက်ပျက်စီးမှု များပြားလာခြင်းများကြောင့်  လုံခြုံရေးတပ်ဖွဲ့ဝင်များက ထန်တလန်မြို့အတွင်းရှိ နေရာအချို့အား ယာယီဆုတ်ခွာစွန့်လွှတ်ခဲ့ကြရပြီး ရန်သူအား ရင်ဆိုင်ထိန်းချုပ်ထားခဲ့သည်။

တပ်မတော်စစ်ကြောင်းများအနေဖြင့် ထန်တလန်မြို့အတွင်းရှိ ယာယီစွန့်လွှတ်ခဲ့ရသော နေရာများအား ပြန်လည်သိမ်းပိုက်ထိန်းချုပ်နိုင်ရေး လိုအပ်သည့် ပြင်ဆင်စုဖွဲ့မှုများဆောင်ရွက်ပြီး ၂၀၂၆ ခုနှစ် ဇွန် ၁၂ ရက်မှစ၍ အကြမ်းဖက်သောင်းကျန်းသူများအား အခက်အခဲမျိုးစုံကြားမှ သက်စွန့်ကြိုးပမ်းဆောင်ရွက်ခဲ့ရာ ထန်တလန်မြို့အတွင်းရှိ မြို့နယ်ရဲစခန်းအား ဇွန်လ ၁၃ ရက်တွင် လည်းကောင်း၊ အမှတ်(၃) အခြေခံပညာမူလတန်းကျောင်းအားဇွန် ၁၉ ရက်တွင် လည်းကောင်း၊ အမှတ်(၁) အခြေခံပညာ အထက်တန်းကျောင်းအား ဇူလိုင်လ ၅ ရက်တွင် လည်းကောင်း၊ ပြည်သူ့ဆေးရုံအား ဇူလိုင်လ ၈ ရက်တွင် လည်းကောင်း၊ မြို့နယ်မီးသတ်ရုံးအား ဇူလိုင်လ ၁၂ ရက်တွင် လည်းကောင်း၊ ဇူလိုင် ၁၅ ရက်နေ့ ညနေပိုင်းတွင် ဟိုတယ်ဇုန်နေရာအားလည်းကောင်းအသီးသီး ပြန်လည်သိမ်းပိုက်ထိန်းချုပ်နိုင်ခဲ့သဖြင့်  ယနေ့တွင် ထန်တလန်မြို့အား အလုံးစုံပြန်လည်သိမ်းပိုက် ထိန်းချုပ်နိုင်ခဲ့ပြီဖြစ်သည်။   

တပ်မတော်စစ်ကြောင်းများအနေဖြင့် ထန်တလန်မြို့အား ပြန်လည်ထိန်းချုပ်ရရှိရေးအတွက် ရွပ်ရွပ်ချွံချွံ အဆင့်ဆင့် ပြန်လည်တိုက်ခိုက်ခဲ့ရာ စစ်ဆင်ရေးကာလအတွင်း အကြမ်းဖက်သောင်းကျန်းသူပူးပေါင်းအဖွဲ့များထံမှ အလောင်းများ၊လက်နက် မျိုးစုံ ၊ ခဲယမ်းများနှင့် ဆက်စပ်ပစ္စည်းများသိမ်းပိုက်ရရှိခဲ့ပြီး  လုံခြုံရေးတပ်ဖွဲ့ဝင်အချို့ နိုင်ငံတော်နှင့် တပ်မတော်အတွက် မြင့်မြတ်စွာအသက်ပေးလှူခဲ့ကြရသည်။

တပ်မတော်စစ်ကြောင်းများအနေဖြင့် ချင်းပြည်နယ်အတွင်းရှိ အကြမ်းဖက်သောင်းကျန်းသူများ ယာယီစိုးမိုးထားသည့် မြို့ရွာများအား ပြန်လည်သိမ်းပိုက်ထိန်းချုပ်ကာ ဆက်သွယ်ရေးလမ်းကြောင်းများအား ဖွင့်လှစ်ပေးနိုင်ခဲ့ပြီး အဆိုပါဒေသများတွင် ဒေသဖွံ့ဖြိုးရေးလုပ်ငန်းများ အမြန်ဆုံးပြန်လည်ဆောင်ရွက်နိုင်ရေးအတွက် နိုင်ငံတော်အစိုးရ၏ လမ်းညွှန်မှုနှင့်အညီ ပြန်လည်ထူထောင်ရေးပစ္စည်းများနှင့် ထောက်ပံ့ရေးပစ္စည်းများကို တပ်မတော်လေယာဉ်များ၊ မော်တော်ယာဉ်များဖြင့် သက်ဆိုင်ရာဒေသအလိုက် အချိန်နှင့်တစ်ပြေးညီပို့ဆောင်ပေးလျက်ရှိပြီး သက်ဆိုင်ရာ ဌာနများအလိုက် တာဝန်ရှိသူများကလည်း   ဒေသတွင်းပြန်လည်ထူထောင်ရေးလုပ်ငန်းများကို အင်တိုက်အားတိုက် ဆောင်ရွက်ပေးလျက်ရှိသည်။  

ထိုသို့တပ်မတော်စစ်ကြောင်းများက ထန်တလန်မြို့တစ်ခုလုံးအား  အလုံးစုံပြန်လည်သိမ်းပိုက်ထိန်းချုပ်ပြီးချိန်တွင်အကြမ်းဖက်သမားများအနေဖြင့်  စစ်ရေးပစ်မှတ်မဟုတ်သည့် အစိုးရရုံးဌာနများ၊ သာသနိကအဆောက်အအုံများ၊ ဆေးရုံဆေးခန်းများ၊ စာသင်ကျောင်းများနှင့်လူနေအိမ်များအတွင်း  ဘန်ကာများ၊ ဆက်သွယ်ရေးမြောင်းများ၊ ပစ်ကျင်းများဆောက်လုပ်၍ ယာယီခံစစ်စခန်းအဖြစ်အသုံးပြု၍ အခြေချဝင်ရောက်နေထိုင်ခြင်း၊ ဒေသခံပြည်သူများ၏ နေအိမ်များနှင့်ဈေးဆိုင်များအတွင်းရှိ အသုံးအဆောင်ပစ္စည်းများနှင့် အဖိုးတန်ပစ္စည်းများကိုလည်း အတင်းအဓမ္မယူဆောင် အသုံးပြုခြင်း၊ ဖျက်ဆီးခြင်းများစသည့်  အကြမ်းဖက်လုပ်ငန်းများ လုပ်ဆောင်ခဲ့သည်ကို တွေ့ရှိရသည်။

NUG, CRPH အကြမ်းဖက်အဖွဲ့များသည်နိုင်ငံရေး၊ လူမျိုးရေး၊ ဒေသကောင်းစားရေးဟု ခေါင်းစဉ်အမျိုးမျိုးတပ်၍ အေးချမ်းစွာနေထိုင်လျက်ရှိသော ပြည်သူများအားနိုင်ငံရေးဝါဒမှိုင်းများတိုက်ကာ အကြမ်းဖက်မှုကိုလိုလားသော EAO အဖွဲ့များနှင့် ချိတ်ဆက်ပေး၍ PDF အမည်ခံအကြမ်းဖက်သမားများအဖြစ် မွေးထုတ်ကာ တိုင်းဒေသကြီးနှင့် ပြည်နယ်အချို့ရှိ မြို့၊ ရွာများ၌ တိုက်ပွဲများ ဖော်ဆောင်ရန် ခိုင်းစေခြင်းများကြောင့် လက်တွေ့တွင် အဆိုပါဒေသရှိ ပြည်သူလူထုနေထိုင်ရာ မြို့၊ ရွာများ ပျက်စီးခဲ့ကြရပြီး ဒေသခံများအနေဖြင့် တိုက်ပွဲကင်းလွတ်ရာနေရာများသို့ တိုက်တာ၊ အိုးအိမ်၊ စည်းစိမ် များကို စွန့်လွှတ်၍ ယာယီ နေရပ်စွန့်ခွာခဲ့ကြရသည်။ ယခုအခါ ပြည်သူများအနေဖြင့် PDF အမည်ခံအကြမ်းဖက်သမားများ၏ အကြမ်းဖက်လုပ်ရပ်များအပေါ်  ရွံရှာစက်ဆုတ်မုန်းတီးမှုများဖြစ်ပေါ်လာပြီး ၎င်းတို့အား လက်မခံနိုင်တော့သဖြင့် အကြမ်းဖက်သမားများ၏ လှုပ်ရှားသွားလာမှုသတင်းများနှင့် နေထိုင် အခြေပြုရာနေရာများကို နီးစပ်ရာတပ်မတော်စစ်ကြောင်းများထံ သတင်းပို့ခြင်းများဖြင့် တပ်မတော်၏ ဒေသတည်ငြိမ်အေးချမ်းရေးလုပ်ငန်းများ ဆောင်ရွက်ရာတွင် အင်တိုက် အားတိုက် ပူးပေါင်းပါဝင်ဆောင်ရွက်လာကြသည်။

တပ်မတော်စစ်ကြောင်းများက ယခုကဲ့သို့ ထန်တလန်မြို့နှင့် ဒေသတစ်ဝိုက်အားပြန်လည်ထိန်းချုပ်နိုင်ခဲ့သည့်အတွက် ဒေသခံပြည်သူများအနေဖြင့် များစွာကျေးဇူးတင် ဝမ်းမြောက်ဂုဏ်ယူလျက်ရှိကြောင်းနှင့် တပ်မတော်စစ်ကြောင်းများကလည်းအဆိုပါ ဒေသများအတွင်း တိုက်ပွဲများကြောင့်ယာယီနေရပ်စွန့်ခွာနေထိုင်ခဲ့ကြရသည့် ဒေသခံပြည်သူများအား ၎င်းတို့နေရပ်ဒေသများသို့ ပြန်လည်ဝင်ရောက်အခြေချနေထိုင်နိုင်ရေး လိုအပ်သည်များ ကူညီဆောင်ရွက်ပေးခြင်း၊ မိုင်းအန္တရာယ်ကင်းရှင်းစေရေးအတွက် မိုင်းရှင်းလင်းရေးလုပ်ငန်းများဆောင်ရွက်ပေးခြင်း၊ ယိုယွင်းပျက်စီးခဲ့ရသည့် အခြေခံအဆောက်အအုံများအား ပြန်လည်ပြုပြင်ပေးခြင်းနှင့် ဒေသခံပြည်သူများ၏ ပညာရေး၊ ကျန်းမာရေးစသည့် လူမှုစီးပွားဘဝများမြင့်မားစေရေးတို့အတွက် လိုအပ်သည့် ဒေသတွင်းပြန်လည်ထူထောင်ရေးလုပ်ငန်းများ ဆောင်ရွက်ခြင်းတို့ကို နိုင်ငံတော်အစိုးရ၏ စီစဉ်ဆောင်ရွက်မှုဖြင့် သက်ဆိုင်ရာဌာနများမှ  တာဝန်ရှိသူများ၊ ဒေသခံပြည်သူများနှင့်အတူ လက်တွဲပူးပေါင်း၍ အမြန်ဆုံးဆောင်ရွက်ပေးသွားမည်ဖြစ်ကြောင်း သတင်းရရှိသည်။