ချင်းပြည်နယ်၊ တီးတိန်မြို့နယ်တွင် စိတ်ကျန်းမာရေးချို့တဲ့နေသော ချင်းအမျိုးသားတစ်ဦးကို CNA လက်နက်ကိုင်အဖွဲ့က ဖမ်းဆီး သတ်ဖြတ်ခဲ့ကြောင်း သိရသည်။
အဆိုပါကိစ္စနှင့်ပတ်သက်၍ အရေးယူပေးရန် ဇိုမီအဖွဲ့ချုပ်(Zomi Federal Union)က ယမန်နေ့ (ဒီဇင်ဘာ ၁၁ ရက်)က ၎င်းတို့၏လူမှုကွန်ယက် Facebook စာမျက်နှာ၌ ထုတ်ပြန်တောင်းဆိုထားသည်။
တီးတိန်မြို့၊ စကောလမ်းရပ်ကွက်တွင်နေထိုင်သူ စိတ်ကျန်းမာရေးချို့တဲ့နေသော တာန်လန့်ခန့်ဆွင်းသည် ပြီးခဲ့သည့် ဒီဇင်ဘာ ၉ ရက်က တွန်းဇံမြို့သို့ သွားရောက်စဉ် တုန်းတွောင်ကျေးရွာအနီးအရောက်၌ ချင်းလက်နက်ကိုင်အဖွဲ့တစ်ခုဖြစ်သော CNA က ဖမ်းဆီးခဲ့ခြင်းဖြစ်ကြောင်း သိရသည်။
ထိုသို့ ဖမ်းဆီးခံရပြီးနောက် CNA လက်နက်ကိုင်အဖွဲ့က ရိုက်နှက်စစ်ဆေးမေးမြန်းမှုများပြုလုပ်ခဲ့ရာ ပြီးခဲ့သည့် ဒီဇင်ဘာ ၁၀ ရက်၊ နံနက်ပိုင်းတွင်သေဆုံးသွားခဲ့ခြင်းဖြစ်ကြောင်း ထုတ်ပြန်ချက်တွင်ဖော်ပြထားသည်။ ထို့ကြောင့် ဖမ်းဆီးရိုက်နှက်သတ်ဖြတ်မှုနှင့်ပတ်သက်၍ တာဝန်ယူမှုတာဝန်ခံမှုရှိစေရန် CNA လက်နက်ကိုင်အဖွဲ့ခေါင်းဆောင်များအနေဖြင့် ကျူးလွန်သူများကို အရေးယူပေးရန်၊ ချင်းလူမျိုးအချင်းချင်း အကြောင်းမဲ့သတ်ဖြတ်မှုများကို ရပ်တန့်ရန် ဇိုမီအဖွဲ့ချုပ်(Zomi Federal Union)၏ တောင်းဆိုချက်တွင် ဖော်ပြထားသည်။
Crd// NP News
