အီရန်နိုင်ငံအပေါ် အမေရိကန်နှင့် အစ္စရေးတို့ ပူးပေါင်းဆင်နွှဲခဲ့သည့် “Operation Epic Fury” စစ်ဆင်ရေးသည် ၎င်း၏ ရည်မှန်းချက်များ အောင်မြင်ခဲ့ပြီဖြစ်သောကြောင့် ပြီးဆုံးသွားပြီဖြစ်ကြောင်း၊ အမေရိကန်အနေဖြင့် Project Freedom ကိုသာ အာရုံစိုက်တော့မည်ဖြစ်ကြောင်း အမေရိကန် နိုင်ငံခြားရေးဝန်ကြီး မာကို ရူဘီယို က မေလ ၅ ရက်နေ့တွင် သတင်းထောက်များကို ပြောကြားခဲ့သည်။ အဆိုပါစစ်ဆင်ရေးမှာ ဖေဖော်ဝါရီ ၂၈ ရက်နေ့တွင် စတင်ခဲ့ပြီး ဒေသတွင်း ပဋိပက္ခများကို ဖြစ်ပွားစေခဲ့ခြင်းဖြစ်သည်။ ဝါရှင်တန်အနေဖြင့် ယခုအခါတွင် “ငြိမ်းချမ်းရေးလမ်းစဉ်” ကိုသာ ပိုမိုလိုလားကြောင်း ရူဘီယိုက ဆိုသည်။
တစ်ချိန်တည်းမှာပင် ဟော်မုဇ်ရေလက်ကြား (Strait of Hormuz) အတွင်း ပိတ်မိနေသော သင်္ဘောများကို လမ်းညွှန်ပေးရန် တစ်ရက်အလိုကမှ စတင်ခဲ့သည့် အမေရိကန် စစ်ဆင်ရေးတစ်ခုဖြစ်သော “Project Freedom” ကိုလည်း ခေတ္တရပ်နားလိုက်ကြောင်း အမေရိကန်သမ္မတ ဒေါ်နယ်ထရမ့်က ကြေညာခဲ့သည်။ ဤကြေညာချက်သည် နိုင်ငံခြားရေးဝန်ကြီး မာကို ရူဘီယိုက အီရန်အပေါ် တိုက်ခိုက်ရေးစစ်ဆင်ရေးများ ပြီးဆုံးပြီဖြစ်ကြောင်းနှင့် အမေရိကန်အနေဖြင့် Project Freedom ကိုသာ အာရုံစိုက်တော့မည်ဖြစ်ကြောင်း ပြောကြားခဲ့ပြီး နာရီပိုင်းအကြာတွင် ထွက်ပေါ်လာခြင်းဖြစ်သည်။
အီရန်၏ ထိပ်တန်းသံတမန်သည် “ဒေသတွင်းနှင့် နိုင်ငံတကာ ဖြစ်ပေါ်တိုးတက်မှုများ” ကို ဆွေးနွေးရန် တရုတ်နိုင်ငံခြားရေးဝန်ကြီးနှင့် တွေ့ဆုံရန် ပေကျင်းသို့ ရောက်ရှိနေသည်။ ၎င်းမှာ စစ်ပွဲစတင်ကတည်းက မဟာမိတ်နှစ်နိုင်ငံမှ နိုင်ငံခြားရေးဝန်ကြီးများ လူချင်းတွေ့ဆုံသည့် ပထမဆုံးအကြိမ်ဖြစ်သည်။
လက်ရှိတွင် စီးပွားရေးလုပ်ငန်းများနှင့် စားသုံးသူများက သုံးစွဲမှုလျှော့ချလာသဖြင့် ရေနံဝယ်လိုအားမှာ ကိုဗစ်ကပ်ရောဂါကာလ နောက်ပိုင်း အမြန်ဆုံးနှုန်းဖြင့် ကျဆင်းနေသည်။ ကမ္ဘာ့ရေနံအရန်သိုလှောင်မှုများမှာလည်း ကိုဗစ်နောက်ပိုင်း အများဆုံးပမာဏအထိ လျော့ကျသွားခဲ့သည်။ အမေရိကန်နိုင်ငံတွင် ဓာတ်ဆီဈေးနှုန်းများမှာ စစ်ပွဲစတင်ချိန်မှစ၍ ၅၀ ရာခိုင်နှုန်းခန့်အထိ မြင့်တက်လာခဲ့သည်။
