လူပေါင်း ၃၆,၀၀၀ ကျော် သေဆုံးခဲ့တဲ့ တူရကီငလျင်လှုပ်ခတ်ပြီးနောက် ရက်သတ္တတစ်ပတ်အကြာ ဖေဖော်ဝါရီ ၁၃ ရက်မှာ အဆောက်အအုံတစ်ခုလုံး အပျက်အစီးထဲကနေ မိန်းကလေးငယ်တစ်ဦးကို အသက်ရှင်လျက်သား ဆွဲထုတ်ကယ်ဆယ်နိုင်ခဲ့ပါတယ်။
တူရကီနိုင်ငံ၊ အဒီယာမန်ဒေသမှာ ရှာဖွေတွေ့ရှိခဲ့ရတဲ့ မီရေး Miray ဆိုတဲ့ မိန်းကလေးငယ်ကို ကယ်ဆယ်ရေးသမားတွေက ထမ်းစင်ပေါ်တင်ပြီး ကယ်ဆယ်ခဲ့ပုံကို အခင်းဖြစ်ပွားရာကနေ ဗီဒီယိုထုတ်လွှင့် ပြသခဲ့ပါတယ်။
တူရကီအစိုးရတာဝန်ရှိသူတွေက အဲဒီမိန်းကလေးဟာ အသက် ၄ နှစ်ရှိပြီလို့ အစောပိုင်းမှာ ပြောကြားခဲ့ပေမဲ့ နောက်ပိုင်းမှာ မီဒီယာတွေက သူမရဲ့အသက် ၆ နှစ်ဖြစ်ကြောင်း ထုတ်လွှင့်ခဲ့ကြပါတယ်။ “နောက်ဆုံးအသက်ကို မကယ်ပြီးမချင်း မရပ်လိုက်နဲ့” ဆိုပြီးတော့ မီရေးကို ကယ်ဆယ်နေပုံဗီဒီယိုဖိုင်ကို လွှင့်တင်ထားတဲ့ Turkish Coal Enterprises ရဲ့ တွစ်တာ တရားဝင်စာမျက်နှာက ရေးသားထားပါတယ်။
