ဖားဂျာကင်

   " ရှာစမ်းပါဗျာ...မတွေ့သေးဘူးလား"

   စစ်ဝတ်စတိုး ပစ္စည်းအဟောင်းများထည့်သည့် အခန်းထဲ မွှေနှောက် ရှာနေခြင်းဖြစ်၏။

   " သေသေချာချာ သိမ်းထားပါဆို"

   ကျွန်တော်၏ မြည်တွန်တောက်တီးသံကြောင့် စတိုးတာဝန်ခံ ဆရာ စိုးသွင် ခေါင်းငုံကာနေ၏။

   " ကျွန်တော်လည်း တော်တော်ဟောင်းနေပြီဖြစ်လို့ အဟောင်းပုံထဲ ပစ်ထည့် ထားမိတာပါ"

   ကျွန်တော်တိုနှစ်ယောက် စစ်မြေပြင်ဂျာကင် တစ်ထည်ကို အသည်း အသန် ရှာနေခြင်းဖြစ်၏။ ကောက်ရိုးပုံထဲ အပ်ပျောက်နေသလို ပါပဲလား။ စစ်ဝတ်အဟောင်းတွေကလည်း အခန်းပြည့်။

   ကချင်ပြည်နယ်လို အလွန်အေးသည့် ဒေသများရှိ တပ်ရင်းများတွင် အအေးဒဏ်ကို ကာကွယ်နိုင်ရန် စစ်မြေပြင်ဂျာကင်များ ထုတ်ပေးကြ၏။ အတွင်းက ဖော့ခံပြီး မိုးကာသားဖြင့် ချုပ်ထားသည့် ထို နှစ်ဖက်လှ ဂျာကင် ကို ဝတ်လိုက်လျင် ဖောင်းနေသည်။ ဖားခုန်ညှင်းလို ဖြစ်နေလို့ ထို ဂျာကင်ကို စစ်သည်များက ဖားဂျာကင်ဟု ခေါ်ကြသည်။

   ဝတ်ဆင်ရတာနှင့် သယ်ဆောင်ရတာ အဆင်မပြေလို့ အရာရှိများက မဝတ်ကြပါ။ သိုသော် တပ်ရင်းမှူးတော့မပါ။ ဆရာက ဖားဂျာကင် ဝတ်ရတာ ကို တအားနှစ်သက်သည်။ ရှေ့တန်းထွက်စဥ် စစ်ဝတ်စတိုးမှ ဆရာ နှင့် လိုက်ဖက်မည့် ဆိုဒ်ကြီးတစ်ထည် ပေးလိုက်ပါသည်။

   စစ်ဆင်ရေးမှာ ၅လလောက်ကြာပြီး ပြန်လာတော့ ဂျီးအထပ်ထပ် နှင့် ဖားဂျာကင်ကြီးကို ကျွန်တော့်ထံ ပြန်ပေးသည်။ တကယ်လို ရှေ့တန်း ပြန် ထွက်ချိန် လိုမည်ဆိုလည်း အသစ်တစ်ထည် ထုတ်ပေးလိုက်မည်ဟု စိတ်ကူး မိ၏။ သို့သော်..

   " လူလေး..ရှေ့တန်းမှာဝတ်ဖို စစ်မြေပြင်ဂျာကင် အငှားပြန်ထုတ် ပေးပါဦး"

   " ဟုတ်ကဲ့..အသစ်တစ်ထည် လာပေးပါ့မယ် ခင်ဗျ"

   " မလိုဘူး လူလေး...နိုင်ငံတော်က အကုန်အကျများမှာပေါ့၊ ကျုပ် ဝတ် နေကြ အဟောင်းသာ ပြန်ပေးပါ"

   စစ်ဝတ်စတိုးကို အမြန်ပြေးပြီး ယခုလို လိုက်လံရှာဖွေနေခြင်းဖြစ်၏။ စတိုးခန်း အတွင်းမှာ စစ်ဝတ်အဟောင်းတွေနှင့် မွန်းကျပ်နေပါသည်။ အတော်ကြာတော့မှ..

   " တွေ့ပြီဗျ"

   အဟောင်းပုံထဲက ဆရာစိုးသွင် ဆွဲထုတ်လာခဲ့သည်။ မှတ်မိရလွယ် သော တစ်ခါမှ လျော်ထားပုံ မရသည့် ဆရာ၏ ဖားဂျာကင်ကြီးအား ပလပ် စတစ်အိပ်ကြီးထဲ အမြန်ထည့်ပြီး ဆရာ့အိမ်ကို အပြေးလာခဲ့သည်။

   ဆရာက သူ့ဂျာကင်အဟောင်း ဟုတ်မဟုတ် စစ်သေးသည်။ ပြီးမှ..

   " ကျုပ်ကစွဲလမ်းတတ်တယ်..ဒါဆို ဒါပဲလေ..ရော့..ဒီစစ်ခြေအိတ်လေး တော့ အသစ်လဲပေးဦး"

   အမှန်က တပ်ထောက်စတိုးထဲမှ စစ်ဝတ်များသည် စစ်သည်များအ တွက်သာဖြစ်သည်။ အရာရှိများက အရောင်းဆိုင်များမှာ သီးခြားဝယ်ယူရ သည်။ သိုသော် ဆရာဆိုတော့ လုပ်ပေးရမှာပေါ့။

   " သေသေချာချာလျှော်ထားတယ်..လူလေး နမ်းကြည့်လိုက်ပါဦး"

   သူ့ခြေအိတ်ကြီးကို နမ်းခိုင်းနေပြန်ပြီ။ ဆရာစိတ်ချမ်းသာအောင် အ သက်အောင့်ပြီး နမ်းချင်ယောင် ဆောင်လိုက်ရသေးသည်။

   " မနံဘူးဟုတ်လား"

   " ဟုတ်"

   ရှုမဲ့ပြီး ပြန်ဖြေနေပုံကို သူသိနေသည်။ ဆရာကတော့ အဲ့ဒီလိုကို က လိလိုက်ရမှ ကျေနပ်နေသူ။ 

   နားလည်ရခက်သူကြီးရယ်။