အမြန်လမ်းတွင် ခွေးကိုရှောင်တိမ်းရာမှ ယာဉ်တိမ်းမှောက်မှုဖြစ်ပွား၍ ၃ ဦး သေဆုံး

ရန်ကုန်-မန္တလေးအမြန်လမ်းတွင် ပရဟိတယာဥ်က ခွေးကိုရှောင်တိမ်းရာမှ တိမ်းမှောက်မှုဖြစ်ပွားကာ စေတနာ့ဝန်ထမ်း တစ်ဦး အပါအဝင် (၃)ဦးသေဆုံးသွားခဲ့ကြောင်း သိရသည်။

ဖြစ်စဉ်မှာ ယမန်နေ့(မတ်လ ၁၆ ရက်) နံနက် ၉ နာရီအချိန်ခန့်က ရန်ကုန်-မန္တလေးအမြန်လမ်း (၉၇)မိုင် (၆)ဖာလုံ နှင့် (၅)ဖာလုံအကြားတွင် ဖြစ်ပွားခဲ့ခြင်းဖြစ်ကြောင်း သိရသည်။
“အောင်ဇေလူမှုကယ်ဆယ်ရေး လူနာတင်ယာဉ်က လမ်းကဖြတ်တဲ့ခွေးကို ရှောင်ရင်းနဲ့ အရှိန်မထိန်းနိုင်ဘဲနဲ့ တိမ်းမှောက်ခဲ့ခြင်း ဖြစ်သည်။ အဆိုပါ ယာဉ်တိမ်းမှောက်မှုကြောင့် ယာဉ်ပေါ်တွင် လိုက်ပါလာသူ(၅)ဦးအနက် အသက်(၁၈)နှစ်အရွယ် စေတနာ့ ဝန်ထမ်းအမျိုးသမီးတစ်ဦး အပါအဝင် အသက်(၅၀)နှစ်အရွယ် အမျိုးသားတစ်ဦး နှင့် အသက်(၅၄)နှစ်အရွယ် အမျိုးသမီးတစ်ဦးတို့ သေဆုံးသွားခဲ့ကြောင်း သိရသည်။
ရန်ကုန်-မန္တလေးအမြန်လမ်းတွင် မတ်လ ၁၆ တစ်ရက်အတွင်း ယာဉ်မတော်တဆမှု (၃)ကြိမ်ဖြစ်ပွားခဲ့ပြီး၊ ကျား(၁)ဦး၊ မ(၂)ဦးသေဆုံးကာ၊ ကျား(၇)ဦး၊ မ(၆)ဦး ထိခိုက်ဒဏ်ရာရရှိခဲ့ကြောင်း အမြန်လမ်းမီးသတ်တပ်ဖွဲ့၏ ထုတ်ပြန်ချက်အရ သိရသည်။
အလားတူ ပြီးခဲ့သည့် မတ်လ ၁၄ ရက်ကလည်း ရန်ကုန်တိုင်းဒေသကြီး၊ အလုံမြို့နယ်တွင် နောက်ဆုံး အဆင့်လူနာကို ပြန်သယ်လာသော ပရဟိတယာဥ်သည် စက်ချို့ယွင်းမှုဖြစ်ပွားခဲ့ရာ လမ်းဘေးသစ်ပင်ကို ဝင်တိုက်မိသည့်အတွက် (၆)ဦးဒဏ်ရာရရှိခဲ့ဖူးသည်။