နိုင်ငံတကာသတင်းများ

-အိန္ဒိယနှင့်ဘင်္ဂလားဒေ့ရှ်နိုင်ငံတို့သည် ၎င်းတို့၏ နယ်ခြားစောင့်တပ်ဖွဲ့များအကြား တစ်နှစ် ၂ ကြိမ်ပြုလုပ်မြဲဖြစ်သည့် ဆွေးနွေးပွဲများအား ဇွန်လ ၁၁ ရက်မှစ၍ ပြုလုပ်သွားမည်ဖြစ်ပြီး နှစ်နိုင်ငံနယ်စပ်ဖြတ်ကျော်ရာဇဝတ်မှုများ တိုက်ဖျက်ရေးနှင့် ပိုမိုကောင်းမွန် သည့် ပူးပေါင်းဆောင်ရွက်မှုများ ဖန်တီးနိုင်ရေးကိစ္စရပ်များကို ဆွေးနွေးသွားဖွယ်ရှိ သည်ဟု The Hindu သတင်းဌာနက ဇွန်လ ၁၁ ရက်တွင် ဖော်ပြခဲ့ပါသည်။ အဆိုပါ ဆွေးနွေးမှုများပြုလုပ်ရန်အတွက် ဘင်္ဂလားဒေ့ရှ်နယ်ခြားစောင့်တပ်ဖွဲ့ခေါင်းဆောင် ဗိုလ်ချုပ် အေကေအမ်နက်ဇ်မူဟာဆန် (AKM Nazmul Hasan) ဦးဆောင်သည့် အဖွဲ့ဝင် ၁၅ ဦး လိုက်ပါသော ကိုယ်စားလှယ်အဖွဲ့သည် အိန္ဒိယနိုင်ငံ၊ ဒေလီ (Delhi) မြို့သို့ ဇွန်လ ၁၀ ရက်တွင် ရောက်ရှိခဲ့ပါသည်။ အဆိုပါဆွေးနွေးပွဲသည် နှစ်နိုင်ငံနယ်ခြားစောင့်တပ်ဖွဲ့များ အကြား (၅၃) ကြိမ်မြောက်ပြုလုပ်သည့် ဆွေးနွေးပွဲဖြစ်ပြီး ဇွန်လ ၁၄ ရက်ထိ ပြုလုပ်မည် ဖြစ်ကြောင်း သိရှိရပါသည်။

-ဂျပန်၊ အမေရိကန်နှင့် ဖိလစ်ပိုင်နိုင်ငံတို့မှ အမျိုးသားလုံခြုံရေးအကြံပေးများ၏ ပထမဆုံးအကြိမ် သုံးနိုင်ငံဆွေးနွေးပွဲအား ဂျပန်နိုင်ငံတွင်ပြုလုပ်ရန် စီစဉ်လျက်ရှိသည်ဟု သံတမန်သတင်းအရင်းအမြစ်များကပြောကြားလျက်ရှိကြောင်းJapan Today သတင်း ဌာနက ဇွန်လ ၁၁ ရက်တွင် ဖော်ပြခဲ့ပါသည်။ အဆိုပါဆွေးနွေးပွဲအား ဂျပန်အမျိုးသား လုံခြုံရေးအကြံပေး တာကီအိုအာကီဘာ (Takeo Akiba)၊ အမေရိကန်အမျိုးသားလုံခြုံရေး အကြံပေး ဂျိတ်ခ်ဆူလီဗန် (Jake Sullivan) နှင့် ဖိလစ်ပိုင်အမျိုးသားလုံခြုံရေးအကြံပေး ဒူရာဒိုအေနို (Eduardo Ano) တို့ဖြင့် ဇွန်လ ၁၆ ရက်တွင်ပြုလုပ်သွားမည်ဟု ခန့်မှန်း လျက်ရှိပါသည်။ အဆိုပါဆွေးနွေးပွဲသည် ဇွန်လအစောပိုင်းတွင် ဖိလစ်ပိုင်နိုင်ငံ၊ မနီလာ ပင်လယ်အော်၌ သုံးနိုင်ငံကမ်းခြေစောင့်တပ်ဖွဲ့များ ပထမအကြိမ် ပူးတွဲစစ်ရေးလေ့ကျင့်ခန်း ပြုလုပ်ပြီးနောက် ၎င်းနိုင်ငံများ၏ နက်ရှိုင်းစွာ ပူးပေါင်းဆောင်ရွက်မှု၏ သင်္ကေတအဖြစ် ဖြစ်ပေါ်လာခြင်းဖြစ်ကြောင်း သိရှိရပါသည်။

-အိုက်စလန်နိုင်ငံအနေဖြင့် ရုရှားနိုင်ငံနှင့် သံတမန်ဆက်ဆံရေးနှိမ့်ချရန် ဆုံးဖြတ်ခြင်း သည် ၎င်းတို့နှစ်နိုင်ငံအကြား ပူးပေါင်းဆောင်ရွက်မှုများကို ပျက်ပြားစေနိုင်မည်ဖြစ် ကြောင်း ရုရှားနိုင်ငံခြားရေးဝန်ကြီးဌာနက ထုတ်ပြန်ခဲ့သည်ဟု Anadolu Agency သတင်း ဌာနက ဇွန်လ ၁၀ ရက်တွင် ဖော်ပြခဲ့ပါသည်။ ရုရှားနိုင်ငံအနေဖြင့် အချုပ်အခြာ အာဏာပိုင်အိုက်စလန်နိုင်ငံကို တည်ဆောက်ရာ၌ အရေးကြီးသည့် အခန်းကဏ္ဍတွင် ပါဝင်ခဲ့သည့်အပြင် ၎င်းနိုင်ငံ၏ လွတ်လပ်ရေးကို ပထမဆုံးအသိအမှတ်ပြုခဲ့ခြင်းဖြစ် ကြောင်း အဆိုပါထုတ်ပြန်ချက်တွင် ဆက်လက်ဖော်ပြခဲ့ပါသည်။ ထို့ပြင် ရုရှားနိုင်ငံသည် အိုက်စလန်ပြည်သူများ၏ အခက်အခဲနှင့် ရင်ဆိုင်ကြုံတွေ့ခဲ့စဉ်ကာလတွင်လည်း ၎င်း နိုင်ငံ၏ အကျိုးစီးပွားကိုကာကွယ်နိုင်ရန်အတွက် များစွာကူညီဆောင်ရွက်ခဲ့ကြောင်း ၎င်းထုတ်ပြန်ချက်တွင် ထပ်မံဖော်ပြခဲ့သည်ဟု သိရှိရပါသည်။

-ပင်လယ်နက်ကောက်ပဲသီးနှံတင်ပို့မှုသဘောတူညီချက်အရ ရုရှားလယ်ယာ ထွက်ကုန်တင်ပို့ရာ၌ အနှောင့်အယှက်ဖြစ်စေသည့် အတားအဆီးများကို ဖယ်ရှားရာတွင် သိသာထင်ရှားသည့်တိုးတက်မှုများမရှိသေးကြောင်း ရုရှားဒုတိယနိုင်ငံခြားရေးဝန်ကြီး ဆာဂျီဗာရှီနင် (Sergey Vershinin) က ပြောကြားခဲ့သည်ဟု Yenisafak သတင်းဌာနက ဇွန်လ ၁၁ ရက်တွင် ဖော်ပြခဲ့ပါသည်။ ဒုတိယနိုင်ငံခြားရေးဝန်ကြီး ဆာဂျီဗာရှီနင်သည် ကုလသမဂ္ဂကူးသန်းရောင်းဝယ်ရေးနှင့် ဖွံ့ဖြိုးတိုးတက်ရေးဌာန၏ အကြီးအကဲဖြစ်သူ ရီဘတ်ကာဂရင်းစပန် (Rebeca Grynspan) နှင့် ဆွစ်ဇာလန်နိုင်ငံတွင် တွေ့ဆုံဆွေးနွေး မှုများ ထပ်မံလုပ်ဆောင်ခဲ့ပြီးနောက်  ပြုလုပ်ခဲ့သည့် သတင်းစာရှင်းလင်းပွဲအတွင်း အထက်ပါ အတိုင်း ပြောကြားခဲ့ခြင်းဖြစ်ပါသည်။ ရုရှားနိုင်ငံသည် ၎င်း၏ဓာတ်မြေဩဇာတင်ပို့မှု အတွက် အတားအဆီးဖြစ်စေသည့် ဘဏ်လုပ်ငန်းဆိုင်ရာ ကန့်သတ်ချက်များကို ဖယ်ရှားရန် ကြိုးပမ်းဆောင်ရွက်ခဲ့ခြင်းဖြစ်ကြောင်း သိရှိရပါသည်။

-ယူအေအီးသမ္မတ မိုဟာမက်ဘင်ဇာရတ်အယ်လ်နာရန် (Mohamed bin Zayed Al Nahyan) သည် ဇွန်လ ၁၁ ရက်တွင် တူကီယဲနိုင်ငံသို့ အလုပ်သဘောခရီးစဉ်တစ်ရပ် သွားရောက်ခဲ့ပြီး အဆိုပါခရီးစဉ်အတွင်း တူကီယဲသမ္မတ ရီဆက်တေရစ်အာဒိုဂန် (Recep Tayyip Erdogan) နှင့်တွေ့ဆုံကာ ဆွေးနွေးမှုများ လုပ်ဆောင်ခဲ့ကြောင်း The Print သတင်းဌာနက ဇွန်လ ၁၁ ရက်တွင် ဖော်ပြခဲ့ပါသည်။ ၎င်းတို့အနေဖြင့် တွေ့ဆုံမှုအတွင်း ဒေသတွင်းနှင့် နိုင်ငံတကာဖွံ့ဖြိုးတိုးတက်ရေးဆိုင်ရာကိစ္စရပ်များကို ဆွေးနွေးခဲ့ကြပါ သည်။ ထို့ပြင် နိုင်ငံသားများအတွက် ရေရှည်တည်တံ့ခိုင်မြဲပြီး ဟန်ချက်ညီသည့် ဖွံ့ဖြိုး တိုးတက်မှုများရရှိနိုင်ရန် ဒေသတွင်းတည်ငြိမ်မှုရှိစေရေးနှင့် ပူးပေါင်းဆောင်ရွက်မှုများ တိုးမြှင့်ဆောင်ရွက်ရေးတို့ကို အလေးပေးလုပ်ဆောင်ရန် လိုအပ်သည်ဟု ၎င်းတို့က ဆက်လက်ပြောကြားခဲ့ကြောင်း သိရှိရပါသည်။

-မွန်တီနီဂရိုးနိုင်ငံ၌ အစောပိုင်းပါလီမန်ရွေးကောက်ပွဲများကို ဇွန်လ ၁၁ ရက်တွင် ကျင်းပ၍ ၄ နှစ်သက်တမ်းရှိ လွှတ်တော်ကိုယ်စားလှယ်များကို ရွေးကောက်တင်မြှောက် သွားမည်ဖြစ်ကြောင်း TASS သတင်းဌာနက ဇွန်လ ၁၁ ရက်တွင် ဖော်ပြခဲ့ပါသည်။ နိုင်ငံ တစ်ဝန်းရှိ မဲရုံများကို ဒေသစံတော်ချိန် ၀၇၀၀ နာရီတွင်စတင်ဖွင့်လှစ်၍ ၂၀၀၀ နာရီအချိန် တွင် ပိတ်သိမ်းမည်ဖြစ်ပါသည်။ အဆိုပါရွေးကောက်ပွဲများအား မဲဆန္ဒနယ်တစ်ခုတည်း တွင် အချိုးကျကိုယ်စားပြုစနစ်အရ တိုက်ရိုက်လျှို့ဝှက်မဲပေးရမည်ဖြစ်ပြီး လွှတ်တော်သို့ ဝင်ရောက်ရန် ပါတီများနှင့် ညွန့်ပေါင်းအဖွဲ့များအနေဖြင့် သတ်မှတ်ထားသည့် ၃ ရာခိုင်နှုန်း ကျော်ကိုရရှိရန် လိုအပ်မည်ဖြစ်ပါသည်။ အစိုးရအနေဖြင့် အစောပိုင်းရွေးကောက်ပွဲများ အတွက် နိုင်ငံတော်အသုံးစရိတ်မှ ယူရို ၁.၃၅ သန်းကို သုံးစွဲသွားမည်ဖြစ်ကြောင်း သိရှိ ရပါသည်။

-ဂျာမနီသည် ယခုနှစ်ကုန်ပိုင်းတွင် အမေရိကန်ဒေါ်လာ ၄.၃ ဘီလီယံတန်ဖိုးရှိ အစ္စရေး၏ Arrow 3 ဒုံးကျည်ကာကွယ်ရေးစနစ်အား ဝယ်ယူရန်စီစဉ်လျက်ရှိကြောင်း Reuters သတင်းဌာနက ဇွန်လ ၁၁ ရက်တွင် ဖော်ပြခဲ့ပါသည်။ အဆိုပါဒုံးကျည် ကာကွယ်ရေးစနစ်အတွက် ကနဦးငွေပေးချေမှုအဖြစ် အမေရိကန်ဒေါ်လာ ၄၉၅ သန်းအား လာမည့်သီတင်းပတ်အတွင်း ပေးချေမည်ဖြစ်ပါသည်။ အဆိုပါလက်နက်စနစ်သည် ကမ္ဘာ့ လေထုအပြင်ဘက်ရှိ တိုက်ချင်းပစ်ဒုံးကျည်များအား ကြားဖြတ်တိုက်ခိုက်နိုင်ရန်အတွက် ထုတ်လုပ်ထားခြင်းဖြစ်ပါသည်။ Arrow 3 ဒုံးကျည်ကာကွယ်ရေးစနစ်အား အစ္စရေး အာကာသနှင့် လေကြောင်းအဖွဲ့အစည်း (IAI) နှင့် အမေရိကန်တို့မှ ပူးတွဲထုတ်လုပ် ထားခြင်းဖြစ်သောကြောင့် ဂျာမနီ၏ကမ်းလှမ်းချက်အား အမေရိကန်၏အတည်ပြုချက် ရရှိရန် လိုအပ်မည်ဖြစ်ကြောင်း သိရှိရပါသည်။

-ရုရှားနိုင်ငံသည် အီရန်နိုင်ငံနှင့် ကာကွယ်ရေးဆိုင်ရာ ပူးပေါင်းဆောင်ရွက်မှုကို နက်ရှိုင်းအောင် လုပ်ဆောင်နေဖွယ်ရှိကြောင်းနှင့် ယူကရိန်းကို တိုက်ခိုက်ရန် one-way attack drone  ပေါင်းများစွာကို လက်ခံရရှိထားကြောင်း အိမ်ဖြူတော်က ပြောကြားခဲ့ သည်ဟု The new daily သတင်းဌာနက ဇွန်လ ၁၁ ရက်တွင် ဖော်ပြခဲ့ပါသည်။ ရုရှား နိုင်ငံသည် ၎င်းနိုင်ငံတွင်း မောင်းသူမဲ့လေယာဉ်များထုတ်လုပ်ရန် အီရန်နိုင်ငံနှင့် လက်တွဲ ဆောင်ရွက်နေသည့်အပေါ်တွင်လည်း စိုးရိမ်မိကြောင်း အိမ်ဖြူတော်၏ ပြောရေးဆိုခွင့်ရှိသူ ဂျွန်ကာဘီ (John Kirby) က ပြောကြားခဲ့ပါသည်။ ထို့ပြင်ရုရှားသည် လာမည့်နှစ်အစောပိုင်း တွင် အပြည့်အဝလည်ပတ်နိုင်သည့် ဒရုန်းထုတ်လုပ်ရေးစက်ရုံတစ်ခုတည်ဆောက်ရန် လိုအပ်သောပစ္စည်းများကို အီရန်ထံမှ လက်ခံရရှိနေသည်ဆိုသော အချက်အလက်များ အမေရိကန်လက်ဝယ်တွင်ရှိသည်ဟု ဂျွန်ကာဘီက ပြောကြားခဲ့ကြောင်း သိရှိရပါသည်။

-အမေရိကန်နိုင်ငံတစ်ဝန်းတွင်နေထိုင်ကြသော အိန္ဒိယနွယ်ဖွား အမေရိကန်လူမျိုး များသည် နိုင်ငံရေးနယ်ပယ်နှင့် ထိတွေ့မှုရရှိရန်အတွက် ပထမအကြိမ် ဟိန္ဒူ-အမေရိကန် ညီလာခံကိုကျင်းပရန်စီစဉ်လျက်ရှိပြီး ၎င်းညီလာခံတွင် အမေရိကန်အောက်လွှတ်တော်ဥက္ကဋ္ဌ  ကီဗင်မက္ကာသီ (Kevin McCarthy) တက်ရောက်မိန့်ခွန်းပြောကြားမည်ဖြစ်ပါသည်။  အဆိုပါညီလာခံကို ဇွန်လ ၁၄ ရက်တွင် အမေရိကန်လွှတ်တော်အဆောက်အအုံ၌ ကျင်းပမည်ဖြစ်ပြီး အမေရိကန်နိုင်ငံတစ်ဝန်းမှ အိန္ဒိယနွယ်ဖွား အမေရိကန်ခေါင်းဆောင် ၁၃၀ ဦးခန့်နှင့် ဟိန္ဒူနှင့် အိန္ဒိယအဖွဲ့အစည်း ၂၀ ခုမှ ကိုယ်စားလှယ်များတက်ရောက် ကြမည်ဖြစ်ပါသည်။ အမေရိကန်နိုင်ငံတစ်ဝန်း ဟိန္ဒူဘာသာဝင်များသည် ကောင်းမွန်စွာ နေထိုင်ရပ်တည်နေသော်လည်း နိုင်ငံရေးအရ နောက်ကျကျန်ရစ်နေကြောင်း ဟိန္ဒူ ဘာသာဝင် အမေရိကန်လူမျိုး နှလုံးအထူးကုဆရာဝန်ကြီး ရိုမက်ဂျာပရာ (Romesh Japra) က ပြောကြားခဲ့သည်ဟု သိရှိရပါသည်။

-အမေရိကန်နှင့်ဆော်ဒီအာရေဗျနိုင်ငံတို့မှ လေတပ်များသည် ဇွန်လ ၁၀ ရက်တွင် ဆော်ဒီအာရေဗျနိုင်ငံ၊ အနောက်မြောက်ပိုင်းရှိ King Faisal Air Base လေတပ်အခြေစိုက် စခန်း၌ ပူးတွဲစစ်ရေးလေ့ကျင့်မှုတစ်ရပ်ပြုလုပ်ခဲ့ကြောင်း Anadolu Agency သတင်းဌာနက ဖော်ပြခဲ့ပါသည်။ အဆိုပါစစ်ရေးလေ့ကျင့်မှုသည် ပူးပေါင်းဆောင်ရွက်မှုအဆင့်ကို မြှင့်တင် ရန်နှင့် ဒေသတွင်းလုံခြုံရေးနှင့် တည်ငြိမ်အေးချမ်းရေးကို ထိန်းသိမ်းရန်ရည်ရွယ်၍ ပြုလုပ် ခဲ့ခြင်းဖြစ်ပါသည်။ ၎င်းစစ်ရေးလေ့ကျင့်မှုတွင် ပစ်ခတ်မှုအကွာအဝေးအတွင်း အသွင်တူ ဖန်တီးထားသော ပစ်မှတ်များကိုဖျက်ဆီးရန် ကျည်စစ်ကျည်မှန်များကို အသုံးပြုခဲ့ ကြောင်းနှင့် အဆိုပါစစ်ရေးလေ့ကျင့်မှုတွင် F-15SE တိုက်လေယာဉ်များနှင့် အမေရိကန်၏ B-1 Lancer မဟာဗျူဟာမြောက် ဗုံးကြဲလေယာဉ်များ ပါဝင်လေ့ကျင့်ခဲ့ကြောင်း သိရှိရ ပါသည်။

-ဟွန်ဒူးရပ်စ်သမ္မတ ရှီရိုမာရာကတ်စထရို (Xiomara Castro) သည် BRICS ဦးဆောင်သော New Development Bank (NDB) ဘဏ်အဖွဲ့ဝင်အဖြစ် ၎င်းနိုင်ငံအား ဝင်ရောက်ခွင့်ပြုရန် တရားဝင်တောင်းဆိုခဲ့ကြောင်း Global Times သတင်းဌာနက ဇွန်လ ၁၀ ရက်တွင် ဖော်ပြခဲ့ပါသည်။ ကတ်စထရိုသည် ဇွန်လ ၁၀ ရက်တွင် တရုတ် နိုင်ငံ၊ ရှန်ဟိုင်း (Shanghai) မြို့ရှိ ဘဏ်ရုံးချုပ်သို့ သွားရောက်ကာ NDB ဥက္ကဋ္ဌ ဒီလ်မာ ရူဆက်ဖ် (Dilma Rousseff) နှင့်တွေ့ဆုံစဉ် အထက်ပါအတိုင်း တောင်းဆိုခဲ့ခြင်းဖြစ်ပါ သည်။ ထို့နောက် ကတ်စထရိုသည် Huawei ကုမ္ပဏီ၏ ရှန်ဟိုင်းသုတေသနစင်တာသို့ သွားရောက်၍ Huawei ကုမ္ပဏီ၏ ဥက္ကဋ္ဌ လျန်းဟွာ (Liang Hua) နှင့်တွေ့ဆုံကာ သတင်းအချက်အလက်နှင့် ဆက်သွယ်ရေးနည်းပညာ (ICT)၊ ကျန်းမာရေးစောင့်ရှောက်မှုနှင့် ပညာရေး၊ အစိမ်းရောင်ဖွံ့ဖြိုးတိုးတက်ရေးကဲ့သို့ ဒစ်ဂျစ်တယ်အသွင်ကူးပြောင်းရေး လုပ်ငန်းများအပါအဝင် ပူးပေါင်းဆောင်ရွက်မှုပြုလုပ်နိုင်မည့် နယ်ပယ်ကဏ္ဍများနှင့် ပတ်သက်၍ ဆွေးနွေးခဲ့ကြကြောင်း သိရှိရပါသည်။

-တူနီးရှားနိုင်ငံသည် အခြားသောနိုင်ငံများအတွက် နယ်ခြားစောင့်အဖြစ် ဆောင်ရွက်ရန် လက်ခံမည်မဟုတ်ကြောင်း တူနီးရှားသမ္မတ ကာအစ်ဆာအိဒ် (Kais Saied) က ဇွန်လ ၁၀ ရက်တွင် ပြောကြားခဲ့သည်ဟု The New Arab သတင်းဌာနက ဇွန်လ ၁၁ ရက်တွင် ဖော်ပြခဲ့ပါသည်။ မြေထဲပင်လယ်ကို  ဖြတ်ကျော်ဝင်ရောက်လာသည့် ရွှေ့ပြောင်းအခြေချနေထိုင်သူ အရေအတွက်နှင့်ပတ်သက်ပြီး စိုးရိမ်ပူပန်လျက်ရှိသော ဥရောပခေါင်းဆောင်များ၏ ခရီးစဉ်မတိုင်မီ ဆာအိဒ်က အထက်ပါအတိုင်း ပြောကြား ခဲ့ခြင်းဖြစ်ပါသည်။ အီတလီဝန်ကြီးချုပ် ဂျော်ဂျီယာမယ်လိုနီ (Giorgia Meloni)၊ နယ်သာလန် ဝန်ကြီးချုပ် မက်ခ်ရူတီ (Mark Rutte) နှင့် ဥရောပသမဂ္ဂကော်မရှင်အကြီးအကဲ အာဆူလာ ဗွန်ဒါလီယန် (Ursula von der Leyen) တို့သည် ဇွန်လ ၁၁ ရက်တွင် တူနီးရှားနိုင်ငံသို့ လာရောက်မည်ဖြစ်ပါသည်။ ခရီးစဉ်အတွင်း ၎င်းတို့သည် ဘဏ္ဍာရေးအကျပ်အတည်း များနှင့်ရင်ဆိုင်နေရသော တူနီးရှားနိုင်ငံအား အကူအညီအထောက်အပံ့များ ပေးအပ် သွားမည်ဖြစ်ကြောင်း အီတလီဝန်ကြီးချုပ် မယ်လိုနီက ပြောကြားထားသည်ဟု သိရှိရပါသည်။