စစ်ကိုင်းတိုင်းထဲက အကြမ်းဖက်တွေဆီပို့မယ့် တောစီးဖိနပ် အရံ ၁၀၀ ကျော်ကို ခရီးသည်တင်ယာဥ်တစ်စီးပေါ်ကနေ နိုဝင်ဘာ ၂၀ ရက်နေ့၊ နေ့လည်ပိုင်းက ဖမ်းမိခဲ့တယ်လို့ ရဲတပ်ဖွဲ့သတင်းအရ သိရပါတယ်။
သတင်းအရ မန္တလေးမြို့ဘက်ကနေ ထွန်းသိန်း (၅၈)နှစ် (အရာတော်မြို့)နေသူ မောင်းနှင်ပြီး တင့်လွင် (၅၀)နှစ် (အရာတော်မြို့)နေသူ လိုက်ပါလာတဲ့ ယာဉ်အမှတ် MDY-13-6N-6089 အောင်ရတနာခရီးသည်တင်ယာဉ်ကို လုံခြုံရေးပူးပေါင်းအဖွဲ့က စစ်ကိုင်းမြို့၊ တကောင်းရပ်ကွက်မှာရှိတဲ့ ရတနာပုံတံတားဂိတ်မှာ ရှာဖွေစစ်ဆေးမှုတွေ ဆောင်ရွက်ခဲ့ရာကနေ ဖမ်းမိခဲ့တာပါ။
အဆိုပါယာဉ်ပေါ်ကနေ PDFအကြမ်းဖက်သမားတွေ အသုံးပြုဖို့အတွက် သယ်ဆောင်လာတဲ့ ထင်းရှုးသေတ္တာ(၉)လုံးအတွင်းမှ DEFENDER တံဆိပ်ပါ စစ်စိမ်းရောင်လည်တိုဖိနပ် (၁၃၅)ရံကို သိမ်းဆည်းရမိခဲ့တာဖြစ်ပြီး လက်ရှိမှာတော့ တရားခံတွေဖြစ်တဲ့ ထွန်းသိန်းနဲ့ တင့်လွင်တို့အပေါ် စစ်ကိုင်းမြို့မရဲစခန်းက (ပ) အမှတ် ၂၅၄/၂၀၂၃၊ အကြမ်းဖက်မှုတိုက်ဖျက်ရေးဥပဒေပုဒ်မ ၅၀(ည)နဲ့ အမှုဖွင့်အရေးယူထားတယ်လို့ သိရပါတယ်။
